خلونى اتكلم عن شعبنا العريق الشعب المصرى اللى بحس انه بيختلف عن باقى شعوب العالم فى حاجات كتيرة جداً شعب .. شعب ابن نكتة وابن بلد شعب كدة خليط من الشهامة والرجولة والجدعنة والطيبة والكرم .. وهو بردو شعب معجون بمية عفاريت حيث الشقاوة والتناحة والسذاجة والكوميديا اللى بينفرد بيها شعبنا عن كل بلاد العالم .. تبص لوش كل مصرى تحس جواه الف حكاية وحدوتة مع بلده سواء حلوة او وحشة ,, جميلة او تعيسة .. بس كلها حواديت معلمة جوا قلب كل مصرى ومستحيل تخرج من الذاكرة .. تبص على النيل من بعيد تلمح الف ولد وبنت فى حالة حب او حالة عتاب .. وطبعاً النيل سمع وشهد حواديت عشاق ياما .. تقرب من النيل اكتر تلمح فلوكة طايرة زى العصفور فى السما .. تقرب اكتر تلاقى اولاد شوارع بيستحموا وبيبلبطوا فى مية النيل .. تقولة يابنى اطلع هيجيلك بلهارسيار .. يرد عليك بأبتسامة كلها سذاجة ويقولك سيبها على الله يا عم ..تبص حواليك تلاقى اشكال والوان من الملامح المصرية الجميلة تلاميذ مدارس وشباب وبنات وعربية ترمس ووبياع فل وياسمين والابتسامة الحلوة مش بتفارق ملامحهم البسيطة .. تمشى فى وسط الحوارى تلاقى بيوت قديمة وبسيطة تحضنك و شبابيك فاتحة دراعتها على بعض تبص يمينك تلاقى دكان عم محمود التارزى .. ترفع له بأيديك سلام يقولك ووشة الاسمر مليان كرم : اتفضل .. وهنا فى الدكان اللى جنبة عم مينا الساعاتى وتلمح من وراه صورة مريم والمسيح .. وهنا الاسطى فتحى الميكانيكى مشغل تلات عيال بلية .. تقولة ينفع كدة يا عم فتحى بدل ماتقول للعيال يكملوا تعليمهم .. يرد عليك بأبتسامة من تحت الضرس يعنى هما اللى اتعلموا اخدوا اية ؟؟ على الاقل دول بيتعلموا صانعة .. شوارع ضيقة وجميلة وكل شارع بيطل على الف حارة تسمع زغاريط طايرة من بيت يرد عليها البيوت التانية بألف زغروطة .. تفهم انه فرح او سبوع او نجاح .. تخرج من الحوارى الجميلة للمدن الكبيرة تلاقى زحمة وعربيات كتيرة وأشارة مرور محتاسة فى الوسط .. تبص كل جوا عربية تشوف حالة مختلفة .. راجل شارد فى ذهنة .. وفى العربية الصغيرة دى اسرة جميلة .. وفى دى شلة شباب مشغلين مزيكا بصوت عالى .. وده تاكسى مشغل اغنية شعبى .. ودى عيلة على فيسبا .. ودى عربية هلكانة طالع منها دخان مالوش اول من اخر تقول فى عقلك اكيد هى دى العربية اللى عملت خرم الاوزون .. تبعد عن الزحمة شوية تلاقى قهوة مليانة شباب وعواجيز .. اصوات زهر بتترمى فى حضن الطولة .. اوراق كوتشينة مستخبية فى كل أيد .. دخان شيشة وسجاير مسيطر على جو المكان تسمع ضحكة وتسمع نكتة وتسمع حد بيحور فى الكلام .. شباب عاطل فى عيونة يأس من البحث عن الوظيفة .. ودول عواجيز المعاش بيقضوا اوقات جميلة فى اواخر سنين العمر .. شخصيات و رموز ومعتقدات كتير بتكون شكل الحياة المصرية .. ام كلثوم وحليم وكف الخمسة وخميسة ووشوشة الودع والعمة والطربوش وفوانيس رمضان كلها حاجات جميلة بينفرد بيها شعبنا بتكبر جوانا وكبرنا عليها .. وعلاقات صغيرة بتكبر جوا كل مصرى مليانة بالمشاعر والاخوة.. وقت الزنقة تلاقى الف ايد تتمد ليك واوقات تانية ولا حد يسأل فيك ايام حلوة وايام مرة بس ليها فى قلوبنا معزة.. وبنحبها وهى كدة بحلوها ومرها المهم انها عايشة فينا وعايشين فيها ..واحنا جزء منها وهى جزء مننا.. هى كدة حياة الشعب المصرى حياة ليها نكهه ولون وطعم خاص .. أيقاعها شرقى ممزوج بروح زمان وأهلها معروفين بخيرهم فى كل مكان
