من فترة كدة كنت قدام ماكدونالدز اللى فى شارع الميرغنى فى مصر الجديدة لاقيت ولد وبنت كدة شكلهم غريب جداً الولد كان ماسك فى ايديه جيتار اليكتريك اسود وعامل شعرة بطريقة غريبة كدة وكان لابس تى شيرت اسود كدة عليها رسومات وكلام غريب والبنت لابسه جيبة قصيرة سودا وبادى اسودى وعلى عينيها كحل اسود اوى وضاربة روج اسود على شفايفها وتحس انهم مش دريانين بالدنيا حواليهم فى الاول مركزتش اوى وقولت شكلهم باند Bandبيغنوا وكدة وقولت فى عقلى شكلهم بيحبوا الميتل والجو ده .. بعد فترة واحد صاحبى حكى لى انه شاف شله ولاد بنفس الستايل شعر مكوى ونازل على عينيهم ولابسين بنطلونات سودا ضيقة وتى شيرتات سودا عليها كلام ورسومات غريبة ولابسين حلقان فى ودانهم وكلهم شبه بعض .. واحد صاحبى من الاسكندرية بردو شاف نفس المنظر ده فى الداون تاون وكان معاهم بنات محجبات بنفس الاستايل ده !! من كام يوم بقى كدة كنت مع واحد صاحبى لاقيته بيقولى سمعت عن الايموز ؟ قولت اية الايموز ده ؟ لاقيته بيقولى دول شباب كدة ليهم ستايل معين وبيسمعوا مزيكا اسمها الايموز وبيلبسوا لبس غريب كدة زى العيال السيس اللى بتكوى شعرها وبيلبسوا لبس ضيق وبيقولوا عليهم عبدة شيطان وشواذ ! ولأن كانت معلومات صاحبى مش واضحة ومكنتش كاملة اوى عنهم او مش مفهومة وافتكرت انها موجه جديدة والناس بتظيط وخلاص .. المهم لاقيت فى نفس اليوم واحدة صاحبتى بتسألنى عن الايموز وان وائل الابراشى استضاف ولدين منهم فى البرنامج بتاعه .. ابتدى الفار يلعب فى عبى وقولت لازم افهم اية الايموز دول واية اللى بيعملوا فى حياتهم الناس دى !! عملت سيرش على النت اكتشفت ان الموضوع كبير ومنتشر جدا فى مصر ..
الموضوع بداء من شلة شباب فى امريكا الشمالية بيعانوا من ضغوط نفسية فى حياتهم وبيحسوا بالوحدة والعزلة ومعروف انهم شباب حساسين جدا وبيتأثروا بأى حاجة حواليهم ومصطلح Emo هو إختصار لمصطلح متمرد ذو نفسية حساسة (Emotive Driven Hardcore Punk)، أو شخصية حساسة بشكل عام وبداء الايمو فى الانتشار فى معظم دول العالم ومنهم مصر .. شخصية الايمو بتتصف بالوحدة والعزلة والتشاؤم والاكتئاب وخجل وصمت والاحزان الى مروا بيها فى حياتهم متسجله جوا عقلهم ومش قادرين يتخلصوا منها او يتغلبوا عليها وده بيخليهم يميلوا لجرح نفسهم بمطوه او سكينة وشايفين ان بتقطيع جلدهم ولحمهم بيخليهم ينسوا هموهم وان ده اهون بكتير من عذاب النفس اللى هما بيعيشوا فيه لأنهم مقتنعين ان عذاب النفس اشد ألم من عذاب الجسد وغالباً كان بينتهى بيهم الامر للأنتحار .. الايموز بيعتبروا نفسهم جماعة بتعبر عن اللى جواهم من خلال سلوك وفكر معين وده بيعبروا عنه من خلال المزيكا اللى بيسمعوها والتاتو اللى بيحطوها على جسمهم ولبسهم الاسود والضيق واللى من خلاله بيقدروا يتعرفوا بيه على بعض ويبداءوا يساعدوا بعض بالتجمع فى اماكن معينة زى الكوربة والميرغنى وسيتى ستارز .. ممكن كمان الولد الايمو يحب الولد الايمو والبنت تحب البنت بس من غير مايكون فى مابينهم اى اتصال جنسى .. وشايفين ان ده مش شذوذ جنسى ده مجرد مساندة من بعض بالحب .. الايمو ملهمش ديانه معينة يعنى ممكن الايمو يبقى مسلم او مسيحى او يهودى او او او ودى بتبقى اخر حاجة تشغل بالهم وده اللى بيخلى الناس تفتكرانهم عبادة شيطان .. الايموز بيتجمعوا وبيعملوا حفلات بيسمعوا فيها مزيكا اسمها الايمو ميوزك Emo Music تقريباً نفس المزيكا بتاعة الميتل بس بتبقى كل كلماتها بتعبر عن الحزن والحياة والانسانية وعنهم ..الايموز مش بيشوفوا نفسهم غلط لأنهم ببساطة شايفين ان كل اللى بيعملوه انهم بيتجمعوا مع بعض عشان يساعدوا بعض من ضغوط الدنيا والحياة وانهم مش بيأذوا حد غير نفسهم !! .. الايموز ليهم على الفيس بوك جروبس كتيرة اوى متجمعين فيها بيتكلموا عن مشاكلهم وعن اماكن يتقابلوا فيها و منهم بيعمل حفلات ايمو وبيتجمعوا فيها .. يعنى من الاخر شوية شباب بيلاقوا نفسهم فى حاجات معينة وجمعتهم ظروف ومشاكل نفسية بس انا مستغرب انتشرهم بالشكل الخطير دة ماهو لو كل شاب مر بمشكلة فى حياته يبقى على كدة معرض انه يبقى ايمو والظاهرة تنتشر اكتر واكتر .. انا مش كاتب الموضوع ده عشان اهاجم الايموز ولا حاجة انا بس بحاول افهم هما بيفكروا ازاى واية الدافع اللى بيخلى الشباب يبقوا كدة ؟؟ عارف ان مش من حقى انى احكم على الفئة دى من الشباب لأنى معرفش ظروفهم اية .. وحتى لو كانت ظروفهم وحشة اوى كدة ده مش مبرر انهم يلجؤا للايمو ستايل .. انا بس عايز اعرف ربنا فين فى حياتهم ؟ و مدام هما بيحسوا بالنقص والضعف والحزن ديماً ليه ما يلجأوش لربنا بدل ما يقطعوا فى جسمهم ؟؟ وازاى الشباب وصل بيهم الحال لكدة ؟؟ واسباب ظاهرة الايمو اكيد مش هنقدر نحددها بالظبط يمكن فى ظروف اجتماعية ونفسية ودينية وغياب الاهل والتربية والتأثر الغريب بالغرب كل ده بيولد الظواهر دى فى بلدنا .. طب الشباب دى هتفضل كدة من غير ما حد يوجههم للطريق الصح وهيفضلوا عايشين فى غيبوبة كدة ووهم اسمه الايمو ؟؟ و معتقدش ان احنا لو هاجمناهم يبقى ده الحل بالعكس دول هيستمروا فى اللى هما فيه اكتر واكتر .. انا شايف انهم مرضى نفسيين ومحتاجيين تهذيب نفسى ومحتاجيين اللى يساعدهم مش اللى يقفل الباب فى وشهم ..و لو هما حاسيين بالحزن دايماً فى حياتهم طب احنا لية مانحاولش نمدلهم ايدينا ونساعدهم ونعرفهم ان فى امل فى الدنيا والحياة وان التعبير عن الحزن ممكن يبقى بطرق تانية غير اللى هما بيعملوا فى نفسهم ده .. انا مستعد يبقى ليا صاحب ايمو واحاول اخليه انسان كويس على قد ما اقدر لكن لو فضلنا نحارب فيهم معتقدش ان احنا كدة هنواجه الظاهرة دى بشكل سليم .. عامةً ربنا يستر علينا فى الايام اللى جاية !!
