قهوة بحليب

يجلس على كنبة الغرفة ينتظر وصولها بأشتياق فقد مرت ايام عده لم يرا فيها وجهها ولم يسمع صوتها الحنون يستمر فى النظر الى عقارب الساعة التى تتحرك ببطء وتمرالثوانى كالدقائق والساعات كالايام .. واخيراً يرن جرس الباب بعد انتظار طويل .. يفتح الباب مسرعاً .. يبتسم ابتسامة صامتة و يحرك رأسة بمعنى تفضلى .. يذهب الى المطبخ ويصنع فنجان من القهوة بالحليب .. فهو يعلم جيداً انها تحب تناول القهوة بالحليب على صوت فيروز فى شرفة الغرفة .. يدخل عليها الشرفة حاملاً فنجان القهوة .. تمتزج رائحة القهوة بصوت فيروز .. ويبداء الحديث بينهما
هو : بقالى كتير اوى ماشوفتكيش .. وحشتينى
هى : انت كمان
هو : انا عارف ان كلامى ليكى اخر مرة معجبكيش .. وعارف ان هو ده السبب اللى مخليكى بعيدة عنى طول الفترة اللى فاتت
هى : وادينى جيت علشان نكمل كلامنا
هو : لسة زعلانة ؟
هى : انا زعلانة عليك .. مش اكتر
هو : اوعدك كل شىء هيتصلح
هى : انت كل مرة بتوعدنى .. وبتخلف وعدك
هو : المرة دى غير كل مرة ..
هى : ياريت .. نفسى ترجع زى زمان
هو : هرجع .. بس لازم تقفى جنبى
هى : انا على طول جنبك بس انت مش واخد بالك
هو : جايز كنت انانى ومش بسمع غير نفسى .. بس انا من غيرك بتوه فى الدنيا
هى : لو بصيت جواك هتلاقينى بقولك على الطريق الصح
هو : بس انتى كمان اتغيرتى معايا ومابقتيش زى الاول
هى : اتغيرت بسبب افعالك وتصرفاتك .. حاولت كتير اقولك انى بضيع منك بس انت مكنتش بتسمعنى
هو : صدقنى انا فوقت من الغيبوبة اللى كنت فيها
هى : نفسى اصدقك بس انا زهقت وتعبت ومش قادرة اكمل انت حتى مش عارف تاخد قرار فى حياتك .. تقدر تقولى هنواجه الدنيا انا وانت ازاى ؟؟
يسود الصمت بينهما لثوانى ثم يقول
هو : انا حاسس انى ضعيف ووحيد اوى من غيرك .. ماتسبنيش !!
تقترب منه وتمسح دموعة .. وتحتضن رأسة ويستمر فى البكاء .. ويقول :
انا عارف انى غلطت فى حقك .. وعارف انك استحملتينى كتير .. انا لما بفتكر تصرفاتى معاكى بكره نفسى
تنظر الى عينية المليئة بالدموع وتقول
انا بحبك
هو : وانا مقدرش اعيش من غيرك
هى : خلاص ننسى اللى فات ونفتح صفحة جديدة
هو : اسف
هى : مسمحاك من غير ما تقولها

وبعد الانتهاء من تناول القهوة يخرج من الشرفة شخص واحد متصالح مع نفسه