كلنا فى الايام دى بنودع سنة وبنفتح درعاتنا لسنة جديدة بغض النظر عن رقمها فى عمر الحياة .. ديما مش بنركز اوى فى السنة اللى بتفوت وكل تركيزنا بيكون مع السنة الجديدة رغم ان احنا ما نعرفش مخبيا لينا اية !! .. سيبكم من السنة الجديدة دلوقتى وفكروا معايا فى السنة اللى فاتت .. ممكن تكون شايفها سنة اى كلام او سنة كانت كئيبة او مش حلوة او او او .. وممكن تكون شايفها كانت سنة جميلة جداً ..وانها احلى سنين حياتك .. اياً كانت النتيجة اكيد استفدت منها بحاجة .. حتى لو مش شايف كدة انا بقولك وبكل ثقة ان السنة اللى فاتت دى سابت حاجة جواك حتى لو كنت مريت بظروف زى الزفت !! .. احنا لية ديماً شايفين الظروف الصعبة بمنظور واحد ؟؟ لية ماتقولش ان لولا الظروف اللى حصلت دى خليتك استفدت او اتعلمت حاجة او طلعت بيها بخبرة حياتية جديدة ؟؟ ماهو الظروف الصعبة اللى بنمر بيها دى على قد ما احنا مش بنحبها على قد ما هى مهمة فى حياتنا .. وماينفعش الحياه تبقى كلها لونها بامبى وسعادة وكدة .. لان زى مانتوا عارفين ان الاوقات واللحظات الوحشة هى اللى بتحسسنا بعد كدة بحلاوة الدنيا وتخلينا نحس بالسعادة .. و ده نفس اللى بيحصل لما تفوت سنة و تيجى سنة وكل مرة بنفضل نقول يارب السنة اللى جاية تبقى احلى من السنة اللى فاتت .. طيب ماهو اية اللى بيخلينا نحس بحلاوة السنة الجديدة ؟ اكيد السنة اللى فاتت بكل ما فيها بقى من ايام حلوة او وحشة .. زى الشمعة كدة لما بتنتهى بتخليك تنور بدلها شمعة جديدة عشان تنور حياتك .. لازم يكون فى ضلمة عشان تنور دنيتك !! فاهمنى ؟؟ بالعكس انا شايف ان احنا لازم نشكر السنة اللى فاتت من عمرنا عشان اكيد سابت لينا حاجة جوانا حلوة.. لحظات حلوة .. لحظات مش حلوة .. يمكن اكتشفنا فيها حاجات جوانا مكناش واخدين بالنا منها .. يمكن سابت لنا يوم حصل فيه حدث غير حياتك او اثر فيك او غير فيك حاجة للاحسن .. ممكن تكون سنة راجعت فيها حسابتك مع نفسك ومع الدنيا .. وبقيت انسان متصالح مع نفسك ومع العالم .. يمكن تكون سابتلك حدث مؤلم بس اكيد اتعلمت منه .. ممكن تكون فقدت حد عزيز عليك او قريب منك .. بس خليتك اقوى فى النهاية وقدرت تكمل حياتك .. يمكن مريت بأزمة او ظروف خليتك تفهم الدنيا صح .. يمكن فى السنة دى اتولد حد هيغير حياتنا للاحسن .. او تطلع شخصية تفيد العالم ... يمكن تكون قابلت الحب اللى كنت مستنيه بقالك سنين ... او لاقيت صديق حقيقى ... او يمكن كنت السبب فى سعادة بنى ادم او اثرت فى حياة غيرك .. يمكن يكون ربنا مسحلك كل ذنوبك السنة دى .. او يمكن يكون ربنا كتبلك عمر جديد !! المهم ان طول السنة بنتعلم حاجات ولحد اخر لحظة فى السنة بنتعلم وهنتعلم حتى لو كانت اخر ايام عمرنا !! اهم حاجة ان احنا نكون استفدنا من اللى فات سواء كان حلو او لا .. وخليك مؤمن من جواك انك اكيد اكيد استفدت اى حاجة من السنة دى حتى لو شايف ان مالهاش لازمة او فايدة دلوقتى .. بس اكيد هتفيدك قدام وفى النهاية احب اشكر ال 365 يوم اللى فى السنة عشان بيخلونى افهم معنى الدنيا اكتر وافهم نفسى اكتر !! والسلام عليكم ورحمة الله وبركاته
